ప్రతి కుటుంబానికి రూ.5 లక్షల జీవిత బీమా పథకం ద్వారా ప్రజా ప్రభుత్వం భరోసా
దేశంలోనే వినూత్న సంక్షేమ కార్యక్రమానికి తెలంగాణ ప్రజా ప్రభుత్వం శ్రీకారం
నవంబర్ 19న ముఖ్యమంత్రి శ్రీ ఏ.రేవంత్ రెడ్డి చేతుల మీదుగా ప్రారంభం
సూర్యాపేట జిల్లాలో సుమారు 3 లక్షల 29 వేల 974 కుటుంబాలకు ఆర్థిక లబ్ది చేకూరేలా కార్యాచరణ
అర్హుల గుర్తింపు, పారదర్శక నమోదు ప్రక్రియ పై జిల్లా కలెక్టర్ తేజస్ నంద్ లాల్ పవార్ ప్రత్యేక దృష్టి
సూర్యాపేట జిల్లాలోని పేద, మధ్యతరగతి కుటుంబాలకు ఆర్థిక భద్రత కల్పించడమే లక్ష్యంగా తెలంగాణ ప్రజా ప్రభుత్వం మరో ప్రతిష్టాత్మక సంక్షేమ కార్యక్రమానికి శ్రీకారం చుట్టింది.
కుటుంబానికి ఆధారంగా నిలిచే కుటుంబ పెద్దకు అనుకోని ప్రమాదం లేదా మరణం సంభవించినప్పుడు ఆ కుటుంబం ఆర్థికంగా కుంగిపోకుండా అండగా నిలిచేందుకు ‘ఇందిరమ్మ కుటుంబ జీవిత బీమా పథకం’ ను ప్రవేశపెడుతోంది.
కుటుంబ పెద్దను కోల్పోయిన విషాద సమయంలో ఆ కుటుంబం జీవనోపాధి కోసం ఇతరులపై ఆధారపడకుండా, ఆర్థికంగా నిలదొక్కుకునేందుకు రూ.5 లక్షల జీవిత బీమా రక్షణ కల్పించడం ఈ పథకం ప్రధాన ఉద్దేశం.
ప్రతి కుటుంబానికి భరోసా కల్పించాలనే సంకల్పంతో ప్రజా ప్రభుత్వం రూపొందించిన ఈ పథకం రాష్ట్రంలోని లక్షలాది కుటుంబాలకు భవిష్యత్తుపై నమ్మకాన్ని కల్పించనుంది. మాజీ ప్రధానమంత్రి ఇందిరాగాంధీ జయంతిని పురస్కరించుకుని నవంబర్ 19న ముఖ్యమంత్రి శ్రీ ఎ. రేవంత్ రెడ్డి ఈ పథకాన్ని అధికారికంగా ప్రారంభించనున్నారు.
రాష్ట్రంలోని ప్రతి కుటుంబానికి జీవిత బీమా రక్షణ కల్పించే దిశగా చేపట్టిన ఈ కార్యక్రమం దేశానికే ఆదర్శంగా నిలుస్తుందని రాష్ట్ర ఉప ముఖ్యమంత్రి భట్టి విక్రమార్క పేర్కొన్నారు.
కుటుంబానికి అండగా ఇందిరమ్మ కుటుంబ జీవిత భీమా భరోసా
సాధారణంగా కుటుంబంలో సంపాదించే వ్యక్తి అనారోగ్యం, ప్రమాదం లేదా ఇతర కారణాలతో మరణిస్తే ఆ కుటుంబం ఒక్కసారిగా అనేక సమస్యలను ఎదుర్కోవాల్సి వస్తుంది. ముఖ్యంగా పేద కుటుంబాల్లో కుటుంబ పెద్ద మరణం ఆర్థికంగా తీవ్ర ప్రభావం చూపుతుంది. పిల్లల చదువులు, కుటుంబ సభ్యుల పోషణ, గృహ అవసరాలు, అప్పుల చెల్లింపులు వంటి బాధ్యతలు భారంగా మారుతాయి. రోజువారీ కూలి పనులు చేసుకుంటూ జీవించే కుటుంబాల పరిస్థితి మరింత దయనీయంగా మారుతుంది.
ఇలాంటి పరిస్థితుల్లో బాధిత కుటుంబాలకు తక్షణ ఆర్థిక భరోసా కల్పించాలనే ఆలోచనతో ప్రభుత్వం ఈ పథకాన్ని రూపొందించింది. కుటుంబానికి సంపాదన అందించే వ్యక్తి మరణించిన సందర్భంలో రూ.5 లక్షల బీమా మొత్తం అందించడం ద్వారా ఆ కుటుంబం ఆర్థికంగా నిలదొక్కుకునేందుకు అవకాశం కల్పించనుంది.
కుటుంబంలో సంపాదించే వ్యక్తి ప్రాణానికి ఆర్థిక భద్రత కల్పించడమే కాకుండా, ఆయనపై ఆధారపడిన కుటుంబ సభ్యుల భవిష్యత్తుకు భరోసా ఇవ్వడం ఈ పథకం ప్రత్యేకత. కష్టకాలంలో ప్రభుత్వం తమకు అండగా ఉంటుందనే నమ్మకాన్ని పేద కుటుంబాల్లో కల్పించడమే దీని వెనుక ఉన్న ప్రధాన ఆశయం.
కుల మతాలకు అతీతంగా ప్రతి కుటుంబానికి ఈ అవకాశం
ఈ పథకంలో కులం, మతం, ఆదాయం వంటి భేదాలు లేకుండా రాష్ట్రంలోని ప్రతి కుటుంబానికి బీమా రక్షణ కల్పించాలన్నది ప్రభుత్వ లక్ష్యం. కుటుంబంలో ఉపాధి పొందుతూ కుటుంబ పోషణకు తోడ్పడుతున్న అర్హత కలిగిన వ్యక్తికి ఈ జీవిత బీమా వర్తిస్తుంది.
18 నుంచి 59 సంవత్సరాల మధ్య వయస్సు కలిగిన కుటుంబ సంపాదన సభ్యుడిని బీమా పరిధిలోకి తీసుకోనున్నారు. అర్హత కలిగిన కుటుంబాలు తమకు అనుకూలమైన వ్యక్తిని బీమా కోసం ఎంపిక చేసుకునే అవకాశం కల్పిస్తున్నారు.
ఒక కుటుంబంలో ఒకరి కంటే ఎక్కువ మంది ఉపాధి పొందుతున్నట్లయితే, వారిలో ఎవరికి జీవిత బీమా రక్షణ కల్పించాలనేది కుటుంబ సభ్యులే నిర్ణయించుకోవచ్చు. తద్వారా ప్రతి కుటుంబానికి తమ పరిస్థితులు, అవసరాలకు అనుగుణంగా నిర్ణయం తీసుకునే వెసులుబాటు ఉంటుంది.
కుటుంబంలో ప్రధానంగా ఆదాయం సంపాదించే వ్యక్తి ఎవరు? ఆయనపై ఎంతమంది ఆధారపడి ఉన్నారు? కుటుంబ పోషణలో ఎవరి పాత్ర కీలకంగా ఉంది? వంటి అంశాలను దృష్టిలో ఉంచుకుని బీమా కోసం వ్యక్తిని ఎంపిక చేసుకోవచ్చు.
నామినీ ఎంపికలో కుటుంబ సభ్యులకే స్వేచ్ఛ
ఈ పథకంలో మరో ముఖ్యమైన అంశం నామినీ ఎంపిక. బీమా పొందే వ్యక్తి తన కుటుంబ సభ్యుల్లో ఒకరిని లేదా పలువురిని నామినీలుగా ఎంపిక చేసుకునే అవకాశం ఉంది.
అంతేకాకుండా, బీమా మొత్తం రూ.5 లక్షలను నామినీలకు ఏ నిష్పత్తిలో పంపిణీ చేయాలనే విషయాన్ని కూడా కుటుంబ సభ్యులే నిర్ణయించుకునే వెసులుబాటు కల్పిస్తున్నారు.
ఒకరి కంటే ఎక్కువ మందిని నామినీలుగా ఎంపిక చేసుకున్న సందర్భంలో ప్రతి ఒక్కరికీ ఎంత మొత్తాన్ని కేటాయించాలనే వివరాలను కూడా నమోదు చేసుకోవచ్చు. దీనివల్ల బీమా మొత్తం పంపిణీ విషయంలో కుటుంబ సభ్యుల అభిప్రాయానికి ప్రాధాన్యత ఉంటుంది.
నామినీ వివరాలు నమోదు చేసే సమయంలో పేర్లు, సంబంధాలు, ఆధార్ వివరాలు, బీమా పొందే వ్యక్తి ఎంపిక, నామినీల వాటాల వివరాలను సరిచూసుకోవడం కీలకం కానుంది.
ఆధార్ కార్డుల ఆధారంగా అర్హుల గుర్తింపు
పథకానికి అర్హులైన వారిని గుర్తించేందుకు ఆధార్ కార్డులో నమోదైన పుట్టిన తేదీని ప్రామాణికంగా తీసుకోవాలని ప్రభుత్వం సూచించింది. 18 నుంచి 59 సంవత్సరాల వయస్సు కలిగిన అర్హుల వివరాలను సేకరించనున్నారు.
నమోదు ప్రక్రియలో ప్రతి కుటుంబానికి సంబంధించిన వివరాలను క్షుణ్ణంగా పరిశీలించాల్సి ఉంటుంది. కుటుంబంలో ఉపాధి పొందుతున్న వ్యక్తుల వివరాలు, బీమా కోసం ఎంపిక చేసిన వ్యక్తి వివరాలు, నామినీల వివరాలను నమోదు చేయనున్నారు.
ఆధార్ కార్డులోని పుట్టిన తేదీ ఆధారంగా వయస్సును నిర్ధారించడం వల్ల అర్హత కలిగిన వ్యక్తుల ఎంపికలో స్పష్టత ఉంటుంది. వివరాల నమోదు సమయంలో ఆధార్లోని సమాచారానికి, దరఖాస్తులో పొందుపరిచిన వివరాలకు మధ్య వ్యత్యాసాలు లేకుండా చూడాల్సిన బాధ్యత సంబంధిత అధికారులపై ఉంటుంది.
నవంబర్ 14 నుంచి 18 వరకు విస్తృత ప్రచారం
పథకం ప్రారంభానికి ముందుగానే ప్రజలకు పూర్తి అవగాహన కల్పించేందుకు ప్రభుత్వం ప్రత్యేక ప్రచార కార్యక్రమాలను చేపడుతోంది. నవంబర్ 14 నుంచి 18 వరకు గ్రామాలు, పట్టణాల్లో విస్తృతంగా ప్రచారం నిర్వహించనున్నారు.
గ్రామీణ ప్రాంతాల్లో డప్పు చాటింపు, దండోరా ద్వారా ప్రతి ఇంటికి పథకం వివరాలను చేరవేయనున్నారు. పట్టణ ప్రాంతాల్లోనూ ప్రజలకు అవగాహన కల్పించేలా ప్రత్యేక ప్రచార కార్యక్రమాలు నిర్వహించనున్నారు.
ప్రజలకు పథకం ఉద్దేశం, అర్హతలు, వయస్సు పరిమితి, బీమా మొత్తం, నామినీ ఎంపిక, నమోదు విధానం వంటి అంశాలపై వివరించనున్నారు.
ప్రభుత్వం కల్పిస్తున్న ఈ అవకాశాన్ని ప్రతి కుటుంబం సద్వినియోగం చేసుకునేలా అధికారులు క్షేత్రస్థాయిలో ప్రచారం నిర్వహించాల్సి ఉంటుంది. ముఖ్యంగా పథకాలపై అవగాహన తక్కువగా ఉన్న గ్రామీణ ప్రాంతాలు, మారుమూల ఆవాసాలు, పట్టణాల్లోని పేద కుటుంబాలపై ప్రత్యేక దృష్టి సారించనున్నారు.
జిల్లా లో నవంబర్ 19 నుంచి ప్రత్యేక నమోదు కేంద్రాలు
నవంబర్ 19న పథకం ప్రారంభమైన అనంతరం రాష్ట్రవ్యాప్తంగా గ్రామాలు, పట్టణాల్లో ప్రత్యేక నమోదు కేంద్రాలను ఏర్పాటు చేయనున్నారు. ఈ కేంద్రాల ద్వారా అర్హులైన కుటుంబాల నుంచి వివరాలు సేకరించి నమోదు ప్రక్రియ చేపట్టనున్నారు.
ప్రతి కుటుంబానికి ఈ పథకం ప్రయోజనం అందేలా విస్తృత స్థాయిలో నమోదు కార్యక్రమాన్ని నిర్వహించేందుకు ఏర్పాట్లు చేస్తున్నారు. గ్రామీణ ప్రాంతాల్లో గ్రామ పంచాయతీ స్థాయిలో, పట్టణ ప్రాంతాల్లో సంబంధిత మున్సిపల్ యంత్రాంగం ఆధ్వర్యంలో సమన్వయంతో కార్యక్రమాన్ని ముందుకు తీసుకెళ్లనున్నారు.
ప్రజలు నమోదు కేంద్రాలకు వచ్చినప్పుడు వారికి అవసరమైన సమాచారం అందించడంతో పాటు, దరఖాస్తు ప్రక్రియను సులభతరం చేయడం అధికారుల బాధ్యతగా ఉంటుంది.
కుటుంబ సభ్యులు ఎంచుకున్న బీమా పొందే వ్యక్తి వివరాలు, నామినీ వివరాలు, పంపిణీ నిష్పత్తి వంటి అంశాలను జాగ్రత్తగా నమోదు చేయాల్సి ఉంటుంది. నమోదు పూర్తయిన తర్వాత వివరాలను మరోసారి పరిశీలించడం ద్వారా భవిష్యత్తులో సమస్యలు తలెత్తకుండా చూడవచ్చు.
వివరాలు డిజిటల్ విధానం లో పారదర్శక నమోదు
ఈ పథకంలో నమోదు ప్రక్రియను పూర్తి పారదర్శకంగా నిర్వహించేందుకు ప్రభుత్వం డిజిటల్ విధానానికి ప్రాధాన్యత ఇస్తోంది. దరఖాస్తుల స్వీకరణ నుంచి నామినీ వివరాల నమోదు వరకు ప్రతి అంశాన్ని జాగ్రత్తగా నమోదు చేయాలని అధికారులకు సూచించింది.
కుటుంబ సభ్యులు అందించిన సమాచారాన్ని సంబంధిత డిజిటల్ వ్యవస్థలో నమోదు చేసే సమయంలో ఎలాంటి తప్పులు జరగకుండా ప్రత్యేక శ్రద్ధ వహించాల్సి ఉంటుంది.
ముఖ్యంగా ఒకే కుటుంబానికి సంబంధించిన వివరాలు మరో కుటుంబంతో కలవకుండా, అర్హులైన వ్యక్తి ఎంపికలో పొరపాట్లు లేకుండా చర్యలు తీసుకోవాలి.
దరఖాస్తు నమోదు పూర్తయిన తర్వాత అందులో పొందుపరిచిన వివరాలను సంబంధిత కుటుంబ సభ్యులకు చదివి వినిపించాలి. వారు ఎంపిక చేసుకున్న వ్యక్తి వివరాలు, నామినీల పేర్లు, బీమా మొత్తం పంపిణీ నిష్పత్తి తదితర అంశాలను మరోసారి ధ్రువీకరించుకోవాలి.
కుటుంబ సభ్యుల అంగీకారం తీసుకున్న తర్వాతే నమోదు ప్రక్రియను పూర్తిచేయాలని అధికారులకు స్పష్టం చేశారు. ఈ విధానం వల్ల తప్పులు, అపోహలు, భవిష్యత్తులో తలెత్తే వివాదాలను నివారించేందుకు అవకాశం ఉంటుంది.
సూర్యాపేట జిల్లాలో సుమారు 3 లక్షల 29 వేల 974 కుటుంబాలకు జీవిత బీమా భరోసా
రాష్ట్ర ప్రభుత్వం ప్రతిష్టాత్మకంగా చేపట్టిన ఇందిరమ్మ కుటుంబ జీవిత బీమా పథకాన్ని సూర్యాపేట జిల్లాలో పకడ్బందీగా అమలు చేసేందుకు జిల్లా కలెక్టర్ తేజస్ నంద్ లాల్ పవార్ ప్రత్యేక దృష్టి సారించారు. జిల్లాలోని గ్రామీణ, పట్టణ ప్రాంతాల్లో మొత్తం 3,29,974 కుటుంబాలకు పథకం వివరాలు చేరేలా కార్యాచరణ రూపొందించారు.
జిల్లాలోని 23 మండలాల పరిధిలో 486 గ్రామ పంచాయతీల ద్వారా 2,41,188 కుటుంబాలకు, ఐదు మున్సిపాలిటీల పరిధిలోని 141 వార్డుల ద్వారా 88,746 కుటుంబాలకు పథకంపై అవగాహన కల్పించనున్నారు. గ్రామీణ, పట్టణ ప్రాంతాలను కలిపి మొత్తం 627 గ్రామ పంచాయతీలు, వార్డుల పరిధిలో ఈ కార్యక్రమాన్ని నిర్వహించేందుకు ఏర్పాట్లు చేస్తున్నారు.
నవంబర్ 14 నుంచి 18 వరకు విస్తృత ప్రచారం నిర్వహించి ప్రతి కుటుంబానికి పథకం వివరాలు తెలియజేయనున్నారు. నవంబర్ 19 నుంచి ప్రత్యేక నమోదు కేంద్రాల ద్వారా అర్హులైన కుటుంబాల వివరాలను సేకరించనున్నారు. గ్రామ పంచాయతీ కార్యదర్శులు, ఎంపీడీవోలు, మున్సిపల్ కమిషనర్లు, క్షేత్రస్థాయి సిబ్బంది సమన్వయంతో పనిచేస్తూ అర్హుల గుర్తింపు, వివరాల నమోదు ప్రక్రియను పకడ్బందీగా నిర్వహించనున్నారు.
పేద కుటుంబాలకు కష్టకాలంలో అండగా నిలిచే గొప్ప సామాజిక భద్రతా కార్యక్రమం
ఇందిరమ్మ కుటుంబ జీవిత బీమా పథకం ప్రాముఖ్యతను జిల్లా కలెక్టర్ తేజస్ నంద్ లాల్ పవార్ వివరిస్తూ, కుటుంబాన్ని పోషించే వ్యక్తికి అనుకోని ప్రమాదం లేదా మరణం సంభవించినప్పుడు ఆ కుటుంబం ఆర్థికంగా ఇబ్బందులు ఎదుర్కోకుండా రూ.5 లక్షల జీవిత బీమా రక్షణ కల్పించడం ఈ పథకం ప్రధాన ఉద్దేశమని పేర్కొన్నారు.
కుటుంబ పెద్దను కోల్పోయిన సమయంలో పిల్లల చదువులు, కుటుంబ పోషణ, ఇతర అత్యవసర అవసరాలకు ఈ బీమా మొత్తం ఆర్థికంగా తోడ్పడుతుందని తెలిపారు. కులమతాలకు అతీతంగా అర్హులైన కుటుంబాలకు బీమా భద్రత కల్పించాలనే ప్రభుత్వ సంకల్పం ఎంతో అభినందనీయమని పేర్కొన్నారు.
ఇందిరమ్మ జీవిత బీమా పథకం అమలులో ప్రతి అర్హ కుటుంబానికి సమాచారం చేరడం అత్యంత ముఖ్యమని, ఆధార్లోని పుట్టిన తేదీ ఆధారంగా అర్హుల వయస్సును నిర్ధారించాలని అధికారులకు సూచించారు. బీమా కోసం ఎంపిక చేసిన వ్యక్తి వివరాలు, నామినీల పేర్లు, వారికి కేటాయించే బీమా మొత్తం వాటాలను ఎలాంటి పొరపాట్లకు తావులేకుండా నమోదు చేయాలని ఆదేశించారు.
నమోదు పూర్తయిన తర్వాత కుటుంబ సభ్యులకు వివరాలను మరోసారి చదివి వినిపించి, వారి అంగీకారంతో ప్రక్రియను పూర్తి చేయాలని స్పష్టం చేశారు. ప్రభుత్వ లక్ష్యం క్షేత్రస్థాయిలో పూర్తిస్థాయిలో అమలయ్యేలా సంబంధిత శాఖల అధికారులు సమన్వయంతో పనిచేయాలని సూచించారు.
పేద కుటుంబాల భవిష్యత్తు పై నమ్మకం
సాధారణంగా జీవిత బీమా పొందాలంటే వ్యక్తిగతంగా పాలసీలు తీసుకోవడం, ప్రీమియం చెల్లించడం వంటి ప్రక్రియలు ఉంటాయి. అయితే ప్రతి కుటుంబానికి సామాజిక భద్రత కల్పించాలనే ప్రభుత్వ సంకల్పంలో భాగంగా ఈ పథకాన్ని రూపొందించడం విశేషం.
కుటుంబంలో సంపాదించే వ్యక్తికి ఏదైనా అనుకోని సంఘటన జరిగినప్పుడు రూ.5 లక్షల బీమా మొత్తం ఆ కుటుంబానికి ఆర్థిక ఆసరాగా నిలవనుంది. పిల్లల చదువులు, కుటుంబ పోషణ, ఇతర అత్యవసర అవసరాలను కొంతవరకు తీర్చుకునేందుకు ఈ మొత్తం ఉపయోగపడుతుంది.
కుటుంబ పెద్దను కోల్పోయిన బాధను ఏ ఆర్థిక సహాయం భర్తీ చేయలేకపోయినా, ఆ సమయంలో కుటుంబం పూర్తిగా ఆర్థిక సంక్షోభంలోకి వెళ్లకుండా నిలబెట్టేందుకు ఈ పథకం తోడ్పడనుంది.
ముఖ్యంగా అసంఘటిత రంగాల్లో పనిచేసే కార్మికులు, రోజువారీ కూలీలు, చిన్నచిన్న ఉపాధి పనుల ద్వారా కుటుంబాలను పోషించుకునే వారికి ఈ తరహా సామాజిక భద్రత ఎంతో అవసరం.
సంక్షేమంతో పాటు సామాజిక భద్రత కు ప్రజా ప్రభుత్వం ప్రాధాన్యత
ప్రభుత్వాలు అమలు చేసే సంక్షేమ కార్యక్రమాలు కేవలం తక్షణ ఆర్థిక ప్రయోజనాలకే పరిమితం కాకుండా, ప్రజల భవిష్యత్తుకు భరోసా కల్పించేలా ఉండాలి. ఈ దిశగా ఇందిరమ్మ కుటుంబ జీవిత బీమా పథకం ఒక కీలక అడుగుగా నిలవనుంది.
కుటుంబంలోని సంపాదనపరుడి జీవితానికి బీమా రక్షణ కల్పించడం ద్వారా ఆయనపై ఆధారపడిన కుటుంబ సభ్యులకు ఆర్థిక భద్రత కల్పించాలన్నది ఈ పథకం వెనుక ఉన్న ప్రధాన ఆలోచన.
ప్రతి కుటుంబానికి రూ.5 లక్షల జీవిత బీమా భద్రత కల్పించాలనే లక్ష్యం సామాజిక భద్రతకు కొత్త దిశను చూపనుంది. కులమతాలకు అతీతంగా అర్హత కలిగిన కుటుంబాలకు ఈ అవకాశం కల్పించాలన్న ప్రభుత్వ నిర్ణయం పథకం ప్రాధాన్యతను మరింత పెంచుతోంది.
ప్రజలు ఈ పథకాన్ని సద్వినియోగం చేసుకోవాలి
ప్రభుత్వం అందిస్తున్న ఈ అవకాశాన్ని అర్హులైన ప్రతి కుటుంబం సద్వినియోగం చేసుకోవాలని అధికారులు సూచిస్తున్నారు. నవంబర్ 14 నుంచి 18 వరకు జరిగే ప్రచార కార్యక్రమాల్లో పథకం వివరాలను తెలుసుకోవాలని, నవంబర్ 19 నుంచి ప్రారంభమయ్యే నమోదు ప్రక్రియలో అవసరమైన వివరాలను అందించాలని సూచిస్తున్నారు.
కుటుంబంలో బీమా కోసం ఎంపిక చేసుకునే వ్యక్తి, నామినీల వివరాలను కుటుంబ సభ్యులందరూ చర్చించి నిర్ణయించుకోవడం మంచిది. ఆధార్ కార్డులోని పుట్టిన తేదీ, ఇతర వివరాలను పరిశీలించుకోవాలి. నమోదు సమయంలో అధికారులకు సరైన సమాచారాన్ని అందించాలి.
నమోదు పూర్తయిన అనంతరం నమోదు చేసిన వివరాలను తప్పనిసరిగా పరిశీలించి, తమ అంగీకారాన్ని తెలియజేయాలి.
దేశానికే ఆదర్శంగా... తెలంగాణ ప్రజల సంక్షేమమే ఆలోచనగా
ప్రతి కుటుంబానికి జీవిత బీమా భరోసా కల్పించాలన్న తెలంగాణ ప్రభుత్వ ఆలోచన సామాజిక భద్రత రంగంలో ప్రాధాన్యత కలిగిన కార్యక్రమంగా నిలవనుంది. కుటుంబంలో సంపాదించే వ్యక్తి మరణించినప్పుడు ఆ కుటుంబానికి రూ.5 లక్షల ఆర్థిక రక్షణ అందించడం ద్వారా పేద కుటుంబాలకు ప్రభుత్వ అండను అందించాలన్నది ఈ పథకం లక్ష్యం.
ఒక కుటుంబం ఆర్థికంగా నిలదొక్కుకోవడానికి భద్రత కల్పించడం, పిల్లల భవిష్యత్తుకు ఆసరా ఇవ్వడం, కుటుంబ సభ్యులకు కష్టకాలంలో అండగా నిలవడం వంటి అంశాలను ఈ పథకం ప్రాధాన్యతగా తీసుకుంది.
నవంబర్ 19న ముఖ్యమంత్రి రేవంత్ రెడ్డి చేతుల మీదుగా ప్రారంభం కానున్న ఈ పథకం అమలుకు రాష్ట్రవ్యాప్తంగా ఏర్పాట్లు జరుగుతున్నాయి. జిల్లాల వారీగా కలెక్టర్ల పర్యవేక్షణలో అధికారులు సమన్వయంతో పనిచేస్తూ అర్హులైన కుటుంబాలకు పథకం ప్రయోజనాలు చేరేలా చర్యలు చేపడుతున్నారు.
సూర్యాపేట జిల్లాలోనూ జిల్లా కలెక్టర్ తేజస్ నంద్ లాల్ పవార్ పర్యవేక్షణలో ఈ పథకం పై విస్తృత ప్రచారం, అర్హుల గుర్తింపు, పారదర్శక నమోదు ప్రక్రియకు ప్రాధాన్యత ఇస్తున్నారు.
కుటుంబానికి అండగా నిలిచే వ్యక్తి జీవితానికి రూ.5 లక్షల బీమా రక్షణ.. ఆ కుటుంబ భవిష్యత్తుకు ప్రభుత్వ భరోసా.. ఇదే ఇందిరమ్మ కుటుంబ జీవిత బీమా పథకం ప్రధాన లక్ష్యం.
ప్రతి కుటుంబానికి ఆర్థిక భద్రత కల్పించాలన్న సంకల్పంతో చేపట్టిన ఈ కార్యక్రమం సమర్థవంతంగా అమలైతే రాష్ట్రంలోని అనేక కుటుంబాలకు కష్టకాలంలో కొండంత అండగా నిలవనుంది.