స్కూల్ బస్సుల వేగానికి కళ్లెం వేయాలి.. ప్రమాదాలు జరగకముందే అధికారులు స్పందించాలి
ముఖ్యంగా పట్టణంలోని ఇరుకైన రహదారులు, రద్దీ ప్రాంతాలు, కూడళ్లు, మలుపుల వద్ద స్కూల్ బస్సులు వేగం తగ్గించకుండా ప్రయాణించడం ప్రమాదాలకు దారితీసే అవకాశం ఉంది. మలుపుల వద్ద ఎదురుగా ఎవరు వస్తున్నారో స్పష్టంగా కనిపించని పరిస్థితుల్లో బస్సులను వేగంగా నడపడం మరింత ప్రమాదకరం. బస్సుల్లో విద్యార్థులు ప్రయాణిస్తున్నారనే విషయాన్ని డ్రైవర్లు గుర్తుంచుకోవాలి.
ఈ నేపథ్యంలో జిల్లా ఆర్టీఓ అధికారులు స్పందించి ప్రైవేట్ పాఠశాలల బస్సుల వేగంపై ప్రత్యేక నిఘా ఏర్పాటు చేయాలని, నిబంధనలు ఉల్లంఘించే డ్రైవర్లపై చర్యలు తీసుకోవాలని ప్రజలు కోరుతున్నారు. పాఠశాలల యాజమాన్యాలు సైతం డ్రైవర్లకు స్పష్టమైన హెచ్చరికలు జారీ చేసి, మలుపులు, కూడళ్లు, జనసంచారం ఎక్కువగా ఉండే ప్రాంతాల్లో తప్పనిసరిగా వేగం తగ్గించేలా సూచనలు ఇవ్వాలి. ప్రమాదాలు జరిగిన తర్వాత స్పందించడం కంటే.. ప్రమాదాలు జరగకముందే అధికారులు, పాఠశాలల యాజమాన్యాలు అప్రమత్తం కావాలని పట్టణ ప్రజలు కోరుతున్నారు.