🏠 www.telanganavaartha.in
Watermark
Newspaper Logo
Date of Publish : 05 November 2026, 2:44 am Posted by : Telangana Vaartha

ఆర్టీసీ కార్మికులపై ప్రయాణికుల దాడులను అరికట్టాలి

News Image
మహిళా ఉద్యోగులకు రక్షణ కల్పించాలి – సమస్యల వలయంలో ఆర్టీసీ కార్మికులు
కండక్టర్ ప్రవళిక కుటుంబాన్ని ప్రభుత్వం ఆదుకోవాలి
నల్ల బ్యాడ్జీలతో సూర్యాపేట డిపో ఎదుట కార్మికుల నిరసన
సూర్యాపేట: ఆర్టీసీ కార్మికులపై ప్రయాణికుల దాడులను అరికట్టేందుకు ప్రభుత్వం ప్రత్యేక రక్షణ చట్టాన్ని తీసుకురావాలని, విధి నిర్వహణలో మహిళా ఉద్యోగులకు పూర్తి భద్రత కల్పించాలని స్టాఫ్ అండ్ వర్కర్స్ ఫెడరేషన్, తెలంగాణ ఆర్టీసీ వర్కర్స్ యూనియన్ రాష్ట్ర కార్యదర్శులు బత్తుల సుధాకర్, సుంకరి శ్రీనివాస్ డిమాండ్ చేశారు.
మణుగూరు డిపోలో కండక్టర్‌గా విధులు నిర్వహిస్తున్న ప్రవళిక పది రోజుల క్రితం ప్రయాణికుల దాడిలో తీవ్రంగా గాయపడి సాయి సంజీవని ఆసుపత్రిలో చికిత్స పొందుతూ మృతి చెందడం అత్యంత బాధాకరమని, ఈ ఘటన యావత్ ఆర్టీసీ కార్మిక వర్గాన్ని తీవ్ర దిగ్భ్రాంతికి గురిచేసిందని వారు ఆవేదన వ్యక్తం చేశారు.
ప్రవళిక మృతికి నిరసనగా, ఆమె కుటుంబానికి న్యాయం చేయాలని డిమాండ్ చేస్తూ సూర్యాపేట ఆర్టీసీ డిపో ఎదుట కార్మికులు నల్ల బ్యాడ్జీలు ధరించి నిరసన ధర్నా నిర్వహించారు. ఈ సందర్భంగా మృతురాలి ఆత్మకు శాంతి చేకూరాలని మౌనం పాటించి ఘనంగా నివాళులర్పించారు.
ఈ సందర్భంగా నాయకులు మాట్లాడుతూ ఆర్టీసీ కార్మికులు ప్రజలకు నిరంతరం రవాణా సేవలు అందిస్తూ విధులు నిర్వహిస్తున్నప్పటికీ వారి ప్రాణాలకు కనీస రక్షణ లేకుండా పోతోందని ఆవేదన వ్యక్తం చేశారు. ముఖ్యంగా మహిళా కండక్టర్లు విధి నిర్వహణలో ప్రయాణికుల నుంచి వేధింపులు, దాడులు, అనేక రకాల అభద్రతా పరిస్థితులను ఎదుర్కొంటున్నారని పేర్కొన్నారు. మహిళా ఉద్యోగుల రక్షణకు ప్రత్యేక చర్యలు తీసుకోవడంలో ప్రభుత్వం, ఆర్టీసీ యాజమాన్యం నిర్లక్ష్యంగా వ్యవహరిస్తున్నాయని విమర్శించారు.
రోజురోజుకూ ఆర్టీసీ కార్మికులపై ప్రయాణికుల దాడులు పెరుగుతున్నప్పటికీ వాటిని అరికట్టేందుకు కట్టుదిట్టమైన చర్యలు తీసుకోవడం లేదని, విధి నిర్వహణలో కార్మికుల భద్రతకు బాధ్యత వహించాల్సిన ప్రభుత్వం, యాజమాన్యం ఇప్పటికైనా స్పందించాలని డిమాండ్ చేశారు. ప్రవళిక మృతి కేవలం ఒక కుటుంబానికి జరిగిన నష్టం మాత్రమే కాదని, కార్మికుల భద్రతపై తీవ్ర ఆందోళన కలిగించే ఘటన అని పేర్కొన్నారు.
మరోవైపు ఆర్టీసీ కార్మికులు ఉద్యోగ భద్రత లేక, రోజురోజుకూ పెరుగుతున్న పని భారంతో తీవ్ర ఇబ్బందులు ఎదుర్కొంటున్నారని తెలిపారు. ప్రయాణికుల అవసరాలకు అనుగుణంగా సరిపడా బస్సులు అందుబాటులో లేకపోవడంతో ఉన్న సిబ్బందిపై అదనపు పని భారం పడుతోందని అన్నారు. కార్మికులకు అవసరమైన విశ్రాంతి, భద్రత, సౌకర్యాలు కల్పించడంలో యాజమాన్యం ప్రత్యేక దృష్టి సారించాలని కోరారు.
ఈ సందర్భంగా ప్రభుత్వం, ఆర్టీసీ యాజమాన్యం తక్షణమే కింది డిమాండ్లను పరిష్కరించాలని నాయకులు కోరారు.
1. కండక్టర్ ప్రవళిక కుటుంబానికి కోటి రూపాయల ఎక్స్‌గ్రేషియా చెల్లించాలి.
2. ప్రవళిక కుటుంబంలో ఒకరికి ప్రభుత్వ ఉద్యోగం కల్పించాలి.
3. బాధిత కుటుంబానికి ఐదు ఎకరాల భూమి కేటాయించాలి.
4. డబుల్ బెడ్‌రూమ్ ఇల్లు మంజూరు చేయాలి.
5. మహిళా ఉద్యోగులకు విధి నిర్వహణలో పూర్తి రక్షణ కల్పించాలి.
6. ఆర్టీసీ కార్మికులపై ప్రయాణికుల దాడులను అరికట్టేందుకు ప్రత్యేక రక్షణ చట్టాన్ని తీసుకురావాలి.
7. దాడులకు పాల్పడే వారిపై కఠినమైన చట్టపరమైన చర్యలు తీసుకోవాలి.
8. ప్రతి డిపోలో, ప్రతి బస్సులో కార్మికుల భద్రతకు తగిన రక్షణ చర్యలు చేపట్టాలి.
9. మహిళా కార్మికుల సమస్యల పరిష్కారానికి ప్రత్యేక ఫిర్యాదుల విభాగాన్ని ఏర్పాటు చేయాలి.
10. ఆర్టీసీ కార్మికులకు ఉద్యోగ భద్రత కల్పించాలి.
11. రోజురోజుకూ పెరుగుతున్న పని భారాన్ని తగ్గించాలి.
12. కార్మికులకు తగిన విశ్రాంతి, మెరుగైన పని పరిస్థితులు కల్పించాలి.
13. ప్రయాణికుల అవసరాలకు అనుగుణంగా సరిపడా బస్సులను అందుబాటులోకి తీసుకురావాలి.
ఆర్టీసీ కార్మికుల సమస్యలను పరిష్కరించకుండా, వారి ప్రాణాలకు రక్షణ కల్పించకుండా విధులు నిర్వహించాలని ఆశించడం సరికాదని నాయకులు స్పష్టం చేశారు. ఇప్పటికైనా ప్రభుత్వం, ఆర్టీసీ యాజమాన్యం స్పందించి ప్రవళిక కుటుంబానికి న్యాయం చేయడంతో పాటు కార్మికుల ఉద్యోగ భద్రత, మహిళా ఉద్యోగుల రక్షణ, పని భారాన్ని తగ్గించడం, ప్రయాణికుల సౌకర్యాల మెరుగుదలపై తక్షణ చర్యలు చేపట్టాలని డిమాండ్ చేశారు. ఈ కార్యక్రమంలో టి డబ్ల్యూ యు డిపో కార్యదర్శి భాస్కర్, ఎస్ డబ్ల్యూ ఎఫ్ కోశాధికారి ఏర్పుల.వెంకన్న, యల్లయ్య,వ నాయకులు శ్రీనివాస్ రెడ్డి,టి డ బ్ల్యూ నాయకులు,టిఏం యూ డిపో కార్యదర్శి లచ్చయ్య, ఈ యూ అధ్యక్షులు సేవ్యా, రమేష్ , మల్లయ్య,రామచంద్రు, ఉపేందర్, ముస్తఫా,యూసుఫ్,నరేష్,మంజుల, సువర్ణ, మల్లికా, తదితరులు పాల్గొన్నారు
🏠 Home